Gledatelji u atriju Starog grada na Međimurskom festivalu mogli su u samom uvodu u festivalski program čuti po prvi puta REČI MEĐIMURSKE, koje za tu priliku napisao LEONARDO BAKSA ČEČI, a kazivao IGOR BAKSA. Sve su to popratile fotografije atraktivnih prostora Međimurja na video zidu uz plesne pokrete studija “Korak”.
Leonardo Baksa Čeči već godinama živi i radi u Zagrebu, a srce mu kuca, kako kaže, Međimurski.
REČI MEĐIMURSKE
V Međimurju ima jedno drevo! To je najlepše drevo kaj ga je dragi Bogek dal. Negde na pol pota med Murom i Dravom, vu šeničnomu morju stoji. To je Drevo Najlepših Reči. Ne ga je lefko najti.
Velijo da ga je sam Veter iskal jezero let. Blodel je okoli. Igral je po cele dane svoju noru i kričeču mužiku, ne ga se moglo prijeti tak kak ni dečeca šteri je nove šolce dobil. Rušil je vse pred sobu, na krov škedja je plazil, po bereku vraga tiral, šenicu je gazil kak pijani svati gda pota dimo zgubiju… ali Dreva je ne našel. Kak so leta minula, Veter se zmočil. Saka nota njegve mužike ve je polefko i zmočena titrala, tiha i sramežljiva… Tak zmočeni, na kratko je stal … i mam je zaspal. Bil je tak čvrsto spal da neje ni znal da je nad njim roke krošnji, kak mati nad trudnemu detetom, širom razvleklo Drevo Najlepših Reči! Pod glavu mu je delo vanjkuša detečjim mislima futranoga, a svojemi granami je Drevo češljalo njegve kuštrave lasi. Saki pot gda je Drevo češljom prešlo črez Vetrove lasi, poneka mu je Reč ostala zadenuta med lasmi, onak, kak najlepše cvetje zadenu gizdave,mlade snehe na Veliku Mešu.
Gda se je Veter zbudil, Dreva je ne videti bilo.
Veter se zdigel i poletel. Opet je zaigral svoju mužiku. Naglo je zastal! Čuti je bilo da njegova mužika najenpot ima i reči, Najlepše Reči. O, tak je radosten bil!
Po cele je dane sam igral, plesal okoli i popeval. Mužiku i reči je sipal od Murje do Drave i tijam prek Save, isto kak i pčele v protuletje sipaju peluda od cveta do cveta, i letima tak. Onda se malo bil preveč zaigral, neje pazil i predalko je dišel.
Mužika je ostala, ali Reči je već ne mel! Pak je žalosten bil. Suzu je pustil.
Vidlo je to Drevo Najlepših Reči. Bilo mu je žal Vetra i ksej ga je pozvalo:
„ Vetrek moj dragi, dobil si od mene na poklon najlepše reči, ali ne zato kaj bi ih rasipal, kak hurmok po svetu, već zato kaj bi ih mogel posejati meni na falu. Kak zasluženi poklon si ih dobil i kak zasluženi poklon ih moreš drugomu dati, ali, velim ti, pazi komu ih daješ, naj noriti. Ono kaj je dobro i lepo sam dobri i vu srcu lepi ljudi moreju čuti.“
Zapamtil je Veter kaj mu je Drevo reklo!
Od unda, saki pot dobro pazi komu bu poklonil reč međimursku.
Seme međimursku reči ploda more dati sam ak se poseje poljem srca dobrih ljudi!
(mp)
