Piše: Blaženka Križan
Išče je bela megla plazila po zemlji i to čistam nisko dok je Fika čula kak pajceki rokčejo, krave muču, pes cvili, se je bilo nompak. Zgledavala se, što bi rekel, sosedi so v tajnosti šteli kolinje zbaviti. Pa to tak nejde, kaj jim je?
Megla se zdigla kaj bi se vidla i onak bleda je kredu se po prek zatajiti.
Krave se zbincavlejo, pajceki nagužvani kak paper jen prek drugoga gazijo, piceki pifčejo, a pes sam kaj lanca ne ftrgne. Za škedenj je zavezani i bo ga zrušil tak bnorevle.
Došli so mesar i tri soseda pomagača.
Čuje se: “Gazda, de ste? Išče spiste?“
„A kaj bi, tu smo, kredu smo.“
Najprej so se žganice i pelinkovca tak nažrli, glave so im buknule kak baklje, oči so im drugo formo dobile, onak, hudu i čudnu, a škrljaki su im na bok stali, noge zapičene v Batinim čižmaj kak da so drftale, cigaretlini so jim se v lampi smodili i nekaj so brlondovali i popevali. Pesem pred klanje.
Čuje se – „Samo jedan dan života…, „
Nešči domači se zdrl: „Norci nori, prešikjeni i fejst pijani, kakša pesem je to i čemu?“
Pajceka so dovlekli za rep i vuha, pred mesara, kak pred soca. Rožđi on kak nori, noge so mu z vojkom zavezali i evo koljačkoga noža njemu na vratu. Poncijoš Pilatoš je presodil, tre ga zaklati.
Žene so z vajdlingima dobežale kaj krv ne dide podkvar, potli budo krv zajtrkovali, dale pili, z nožima mahali i kak besni, dale bi klali i samo klali. Ve so koražni i puni pijače. Na so srečo nega več pajceki za klati i nek nam sam Majka Božja pomore kaj to zbavimo kak tre.
Cilikini su predefčerom tri prasice klali, celo selo so zbantuvali. Deca so se koli namatala i da gut je počka pala. Fačuki so jim se živce restegli.
Pajcek je dobil jen zamah z nožom vu vrat, žalosno i bolno je zatulil, štel je pobeči, tresel se, cvilil, za život prosil, ron sam mislila da nabo mogel pobeči, ali o… gleč, pajcek im je fujtnul. Ves f krvi je po gruntu letel kak Sveti Ilijaš, zaletaval se sam v sebe, v nas, v mesara, a onda so si za jim bežali i prijeli ga. Spikali so ga čuda pot v strahu kaj se ne zdigne i pak ne pobegne.
Jezuuuš, strašna slika.
Krvavi grunt s krvavim cvetjem, krvavi pločnik i cela senokoša f krvi. Si su drkali vun-nutri i pozabili na gladnoga pesa. Pes je već bil jako nahuškani i komaj kaj je nekaj dobil ka ftihne.
Ja sam kak mala puckica poskrivce ljukala, a onda pobegla dimo. Stisnula sam si vuha i štela sam se zaprti v romor, ali je nutri bila črna kmica. Rekli so mi da to pajceka ne boli i da oni imaju debelo kožo i da so oni zato tu, kaj bumo ih klali i jeli. Isto so mi rekli za piceke, racike, kravice, birkice i pure. Se je to trebalo hmreti kaj bi mi meli kaj jesti. V želoco mi je bilo hudo, droba so mi skakala i grčila se, a smrad z sosedovoga grunta me skoro zadušil.
Pajceku su dlake skubli i z vrelom vodom ih doli vleki, onda so ga još s kropom polevali onak prav za prav harali i na falate ga zgotavljali. Njegova koža je nakli hičena, na zelenu travu i zgledala je kak da si ju je sam slekel.
On je bokček goli visel, ves obrezan, krvavi i gledal me. Nekaj sam tam morala nesti pak su nam se oči srele. Oči razrogačene je štel vun na mene hititi, kaj bi mi itak nekaj rekel, ali krv je još topla čvapkala vu vajdling i gori so se zdigali mali i malo vekši beli mehuri. Ja sam odbežala dimo prek sih blatnih šlafuri, sa po prek z blatom pošpricana.
Blatna po hrptu i lasima, nesam se mogla zastaviti. Ljudi so okoli bili veseli, nasmijani, pijani, pajcek mrtev a ja pak sozna negdi skrita.
Cela vulica je smrdela na vrelo vodo zmešanu z krvljom, na mašču koja se odma talila i cvirke koji su se odma delali za južinu. Zelje se kuhalo još s toplim pajcekovim mesom, krv se pekla, a i z mozgom su nekaj delali, a toga smrada ne bum nigdar pozabila. Se je masno, smrdeče, krvavo, namusano, šklisko, drhtavo, narezani pajcek vu falate se po sud, v loncima, ranjglama, plehima,… prestrašno za videti i vervati da bo to se ftek pojeđeno.
Pri toj hiži, je se bilo masno, blatno, zašmirano, zamusane kupice su bile tak grde i još fkruhnute, pijana lica su bila tak nora i šteli su još klati i klati. Oči su im bile tuste i črlene, kapki kak stara i nabrana feringa onak naherena, a šape so im bile debele, čerlene i dlakave, koljačke i frugljave z črnimi nofti.
Špeh se kuhal i kuhal, burkal vun z ranjgle, krmavi papki so se pucali za hladnetinu, nofti so se vun pukali, rep haral, vuha so se čistila i falaček mesa šteroga je Štef zarezal bodo deli kcoj.
Ali duha, plač nedožnoga živinčeta, hajka štero su zdigli i mladi život šteri se vgasil kak sveča, ništ je ne bilo vredno toga cirkusa.
I dalje bi se čulo; ljudi dajte fletno to sim, Rudek nejte fušati, tenko režite, nabrusite noža, Gusti prezvuršt bo fini, klobasi so gotovi, a jetreca samo skotajte v melju, posolite, denite malo prpra i spečite na fletno i krvavo.
Celi den je sikak bil krvavi, isto kak jetreca i mesar sa svojim pomagačima koji bi samo klali i klali, kaj gut, de gut i čije gut. Mali Hitler se v njima zbudil i neje jim dal mira.
A dok su jeli, cele falate so pogatali, nesu niti žvakali, a se se cedilo po njivim bradami, po robači, stevljačo, reklecu. Nažlepali so se vina tuduma i kak stekli so bili. Mlajše snehe so im se rivale i zahuškavale, neje bilo znati, je to kolinje il pak svati.
Mesara su zanovetali; „Si jo je il si jo ne?“- Jesam jo. Prasica je pobegla, ali sam jo ipak dostigel, pretekel i rešil. Malo smo se igrali. Mesar je muštra svoje vrste, prekaljeni je komedijaš. Ve bi več on štero gut sneho dosegel ali bil je ves krvavi. Luciferske oči so mu skakale z jene na drugo i rezal ih je z očima ron tak kak pajceka.
I megla, štera je ve bila siva i nekak trudna, krvavo nas je ljukala i zginula je črez nagnute brajde. Pijana il trezna, se je vidla.
Kri te hiže navek čujem plač i roktanje pajceka, strku po dvorišču, a nos mi je ne pozabil smrada, kropa i duhu vrele mašče zmešane z smrtnim hroptajem. Od toga sega mi se želodec napuhaval i glava bobnjala i bilo mi je zlo.
Nigdar, nigdar več nesam vidla kolinje.
V našem dvorišču se je nikdar ne klalo i megla je bila veke bela, belcata kak sneg.